شيكا بيكا وبوليتيكا .. ومقالب أنتيكا ولا تزعل ولا تحزن .. اضحك برضه يا ويكا ها ها ها ها .. ع الشيكا بيكا !

Saturday, March 31, 2007
البـقـاء لله

يَا أَيَّتُهَا النَّفْسُ الْمُطْمَئِنَّة ارْجِعِي إِلَى رَبِّكِ رَاضِيَةً مَّرْضِيَّةً فَادْخُلِي فِي عِبَادِي وَادْخُلِي جَنَّتِي
..
..
..
البقاء لله
..
..
..
توفى يوم الجمعة صباحا
..
..
..
جد
اخي العزيز جدا جدا
..
..
ميليجي
..
..
ربنا يرحمه ويصبرك يا احمد
 
posted by Rivendell** at 10:42 PM | Permalink | 10 الكومنتات الكريمة
Friday, March 30, 2007
تااجزز
عزيزي العزيز زوردياك باعتلي تاج عجيب كدا بيسال على المذاكرة والحاجات المحرجة دي
ولولا غلاوتك عندي يا ولدي ما كنتش جاوبت عليه ابداااان
:D
هل تسعد عندما يمرر لك أحدهم تاجا؟
أكيد اه طبعا .., يعنى لما حد بيمررلى تاج بيبقى فاكرنى
وعايز يعرف أكتر عن سها الانسانة مش المدونة مع انهم مينفصلوش عن بعض
بس فعلا فعلا يعنى ., بتبسط لما حد بيفتكرنى
(( نفس اجابتك يا فؤش))
.
هل مقدار سعادتك أو شعورك أيا كان - عند تمرير التاج لك يختلف حسب المدون الذي يمرر لك التاج؟
اكيد طبعا
.
.
هل تستمتع عند إجابتك عن أسئلة التاج؟
أكيد طبعا بستمتع .., أصل انا من نوع الناس اللى بيحب يتكلم كتيير .., فبعيش بقى فى اجابة اى تاج
((نفس اجابتك يا فؤش))
.
.
هل ترى للتاج أهمية حقيقية ؟
اكيد لانه بيكسر حاجز العالم الافتراضي للتدوين وبيدخل شوية واقعية وبعد انساني اكتر على وشوش المدونين
خصوصا بالنسبة للناس اللي مدوناتهم بتبقى بتتكلم في مواضيع محددة بعيد عن حياتهم
طبعا انا لا ينطبق عليا الموضوع دا لان مدونتي عبارة عن حوار مفتوح عن حياتي واللي ما يشتري يتفرج
:D
.
.
هل فكرت في عمل تاج خاص لك من قبل؟
اينعم
.
.
هل تفضل قراءة أجوبة التاج عند المدونين الآخرين ؟ أم لا تهتم سوى بالتدوينات الأخرى فقط؟
اكيد عشان كسر الحاجز الافتراضي وانا فضولييية جداااااااانز
.
.
عندما ترد على التاج ما الذي تراعيه أكثر؟
الصراحة الشديدة جدا وانها تبقى قصيرة لاني بزهق اوي من الكتابة الكتير
.
.
إلى من تحرص على تمرير التاج؟
أكيد طبعا لكل اصحابى ., ولكل اللى انا عايزهم يكونو قريبين منى (( زيك يا فؤش))
.
.
هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟
اينعم
.
.
هل تلتزم حرفيا بأسئلة التاج ؟
اه على قد ماقدر
.
.
ما هي نوعية التاجات التي تفضلها ؟
النوع البطيخى .., بس يا ريت يكون من غير بذر
(((هههههه ماقدرتش اغيرها ابدااا )))
.
.
____________________
.
.
التاج التانى
.
هل كنت طالب شاطر فى المدرسة ؟
طب ايه الاحراج النفسي والمعنوي دا طيب
هي مراحل
في اول ابتدائي اه وعلى اخره لأ
وبعدين في اعدادي كنت شاطرة بس مش اوي يعني
وبعد كدا ثانوي كنت دحيحة موووووت وشاطرة
واخيرا من ساعة ما دخلت الكلية خاب املي وفشلت الحمد لله
.
.
ايه كانت احب مادة و اكره مادة ليك فى المدرسة ؟
امممم احب مادة الانجليزي لاني كنت بتعلم بسرعة جدا اللغة وبلقطها من غير تعب
واكره مادة الجغرافيا يعععععع كنت بكرههها عمىىىى
مع اني كنت بحب التاريخ جداااا جدااااا
.
.
كنت عايز تطلع ايه وأنت صغير ؟
يعني برضه حالات
الاول خالص ماكنش على بالي اطلع حاجة معينة يعني كنت عايزة اشتغل وبس
وبعد كدا دخلت في مرحلة اني اطلع ظابط هههههههههه
ومن اول ثانوي كدا ابتدى غرام الطب يقع على راسي
ومن ساعت ما دخلت الكلية وانا نفسي احول معهد فني صناعي
امرر التاج للتالي اسماءهم
المتكاظين كلهم كالعادة مع ان ماحدش بيرد غير سول العسل
آلاء
مزمز
محمد عبد الغفار
خالد
رجل من غمار الموالي
ياسمين انسانة لو ماجاوبتيهوش لسه
ا ب ج د
شيماء لحظة صمت
 
posted by Rivendell** at 11:54 PM | Permalink | 11 الكومنتات الكريمة
Thursday, March 29, 2007
يلاااا نررقص
ونجحت



نجحت



نجحت





طلعت الرخصة


طلعت الرخصة


طللللللللععععععت الررررررررخصة




ولا اعرف انا نجحت ازاااااي


بس


نجحت


نجحت


نجحححححححححت
 
posted by Rivendell** at 10:27 AM | Permalink | 7 الكومنتات الكريمة
Tuesday, March 27, 2007
عن الرخصة والامتحان وكل حاجة تانية مالهاش لازمة - تفاصيل يومين
يومين من الشد العصبي المتواصل
لدرجة اني حاسة ان كل الموصلات العصبية بتاعتي شااااااطت
اليوم الأول بدأت مأساته بالآتي
امتحان الراوند العجيب بتاعنا
كنت شغالة باطنة عامة
وجرت العادة ان امتحان الراوند بتاعها بيتأجل
لحد ما الناس تاخد باطنة خاصة
وفعلا الامتحان اتأجل لحد يوم الأربع اللي فات
صحيت على تليفون مفاجئ
أنا .. الوووو
" الله يحرقك ياللي مصحيني"
هي .. امتحان الراوند ما اتلغاش رئيس القسم نزل ورقة
أنا .. نعم ياختي !!
هي .. اه واللهي العيال لسه شايفين الورقة ومتصلين قايلينلي
أنا .. تاني كدا لحسن مش فاهمة
رئيس مين وامتحان مين بالظبط
"الله يحرقكوا كلكوا عالصبح بجد"
هي .. ايه يا بنتي انت مش صاحية واللا ايه
بقولك امتحان الراوند رجع تاني
مكتوب ان ناس كتير راحت لرئيس القسم
وقالولوا عايزين نمتحن فرجع الامتحان تاني
انا .. صمت تاااام
" اه يا دفعة بنت ستين في سبعين الله يحرقكوا"
انا .. ورئيس القسم دا بلبانة واللا ايه يلغي ويرجع مع نفسه كدا
"بروح العائلة الكريمة"
انا .. والامتحان امتى على كدا ان شاء الله
هي .. امتحانك يوم الاتنين
انا .. الاتنين اللي هو كمان 5 ايام دا
هي .. اه
انا .. يا نهار ازرق مبطش تركواز
انا ماعرفش حاجة في الكلينيكال خااالص
" الله يحرقك يا اللي في بالي "
هي .. يلا سلام
وعلى هذا قضيت الخمس ايام في حالة من اللا نوم
بحاول افهم طلاسم الكلينكال اكزام
اللي ماكنتش اتعرفت عليها لسه
بسبب بعض المشاكل المنيلة المتعلقة بدرس العملي
وبعد ما حرقت لمض كتير
وبلبعت كافيين كتير جه يوم الامتحان
انا .. يا فتاح يا عليم يا رزاق يا كريم يا رب
عيني ما غمضتش من امبارح
كل ما انام احلم بعيان النيورو " الجهاز العصبي " بيهجم عليا وبيقولي
انا عندي ايه انا عندي ايه
اعمليلي الريفلكس اعمليلي الريفلكس
وانا بجري وبيجري ورايا دكتور معاه هامر "شاكوش" وبيقولي
وريني الريفلكس وريني الريفلكس
هي .. احنا مجموعة فقر اصلا
هنبقى اخر ناس تتنادي وهنخش على حالة نيورو
انا .. بس يا بنتي ما تتنططيش فيها
واذ فجأة اتنادى على ارقامنا
غريييييبة اول مرة نمتحن بدري وما نقعدش للساعة اتنين
امشي ورا الأستاذ الكبير لحد ما ندخل الأوضة الكبيرة
نملي اسامينا وانا بحاول ابص عالعيانين واستشف نوع الحالة الموجودة
نطلع نقف الاقي عيان نيورو محترف
دول بيبقوا عيانين محترفين
بيلفوا على جامعات مصر كلها وبيسترزقوا من مرضهم
انا .. انت داخل واللا ايه
قالي اه
مشيت وسيبته من غير ولا كلمة
وكل اللي في دماغي اني ألمله فلوس من العيال ونطرقه من هنا
ووقفت وقد نزل عليا الطير
ماهو مادام داخل يبقى مافيش حد فقر غيرنا هيجيله
وياالاااااهوييييييييييييي
انا لا افقه شئ في كشف النيورو
خاااااالص
شكلي هيبقى فااانلة دا غير الاربعين درجة اللي هيطيروا
لاااا ابدا على جثتي مش داخلة هاغيب النهاردة
وقلولهم اني مت وامبارح كانت الجنازة
هو انا هبلة ادخل انا وحالة نيورو في وش بعض
يا لهوتي , ودخلت في حالة طيران عقلي
طلع الدكتور ونادى على اول اسم
الحمد لله مش انا
على غير العادة برضه
عادة بابقى اول اسم وباكل العلقة كاملة
ام هند يعني .. هو ينادي والواد صاحب الاسم ما بيردش
وانا اتلفت حواليا عايزة اعرف مين المنيل دا
خليه ييجي يبقى التيست تيوب بتاعتنا
راح الدكتور منادي على اللي بعده
سها
ها !!
سها
احم ... احم انا اهو يا دكتور
انا هعيط خلاص سيبوني اعيط هابقى انا التيست تيوب .. يا لاااااهوي
ادخل واقعد مالاقيش حالة
الدكتور جه وقال لدكتور تاني هاتلي هشام
" يا نهار اسود حالة النيورو .... يا للااااااااااااااااااااهوي"
ومن لا شئ
لقيت الدكتور باصلي ومش عارفة هو شاف في وشي ايه بالظبط
واضح ان الهلع بان عليا لأقصى درجة
لانه اتلفته تاني وقاله الكلمة السحرية
خلاص بلاش هات صابر
للولوولولوللووووللووللي صابر عيان الكارديو ( القلب ) صديق الطلبة
وجه صابر وش الخييررررررر
الدكتور .. يلا شوفيلي النبض وعلقيلي عليه
انا لسه هامسك ايد صابر
وبما انه محترف وعارف حالته احسن من اجدعها دكتور فيكي يا بلد
قالي بصي يا دكتورة
معدل نبضي من 75 ل 80 ومنتظم ومتساوي على الناحيتين وفي واتر هامر بالس
الدكتور زغرله اخرس يا صابر
المهم انا لقطت منه الكلمتين وبما ان دماغي كانت طارت من الخضة
وولا اجدعها دكتور في العالم
مثلت اني باقيس وباشوف
وحبكتها تمام
واتلفت للدكتور وكريتله اللي صابر قاله بالظبط
الدكتور ضحك كدا وراح سألني سؤالين في حتة انا خنقااها مذاكرة
روحت رازعهمله بثقة
تقولش الرازي انبثق من قبره وجاي يمتحن يا ولا
المهم يعني الراجل اتوهم وقالي يلا امشي
وانا ماكدبتش خبر
خدت ديلي في سناني وطلعت اجري لا يغير رأيه ويسأل تاني
وانا طالعة جاتلي افوريا كنت شوية هاتحزم وارقص
وجالي صابر جالي صابر
لوولوولولولوولولوولولولوللولللييييييييي
...............................
...............................
اليوم التاني بقى وكان اليوم التالي ليه خبط لزق كدا
النهاردة امتحان الرخصة بتاعي
ياااااارب نفسي اطلع الرخصة بقى
بقيت باصحى وانا بخترف بكلمة واحدة
الرخصة .. الرخصة ... تقولش رخصة دخول الجنة يا خي
يومها الصبح كان معاد البروفة في مدرسة السواقة
طبعا انا بسوق عربية اتوماتيك واخر علاقتي بالمانيوال كان من 6 شهور كدا
ومن بعدها كفى الله المؤمنين القتال
يعني موضوع الدبرياج عندي ميت من زمان
ورجلي الشمال مش شغالة اصلا
اروح المدرسة في معادي بالدقيقة
الاقيلك المدرب واقف بيقولي اهلا وسهلا هافطر 5 دقايق
واجي ما تتفضلي معانا
انا .. شكرا سبقتك
" بالسم الهاري يا اخي بقى انا صاحية من النجمة عشان استناك تفطر"
وبعد 15 دقيقة
وكنت انا نمت خلاص عالكرسي اصلا
شرف الباشا
يلا بينا
يلا يا اخويا
وخدني على حتة ارض فاضية مدشدشة كدا
ونزل فرش الاقماع وقعد يتكلم يتكلم
وانا طبعا نايمة
مش ملاحقة اسمعه
والا احط رجلي عالدبرياج
والا ابص على الاقماع بره
ودا مش نازل على اللي جابوه غير انه يقولي يا قمر
وانا عايزة اقوله يا زفت يا هباب
انا ما بحبش شيلان التكليف وانا مش قمر اصلاااااا
انت اعمش يابني واللا ايه
المهم خلينا في اللي احنا فيه لحسن دمي هيتحرق تاني
عدت ساعتين من العذاب االمتواصل
فقدت بعدهم الاحساس برجلي الشمال
ودراعاتي الاتنين كانوا ماتوا من كتر المعافرة مع الدركسيون
التقيييييييييييييل
روحت عالمرور
والمشوار هباااااااب بعيييييييييييييد
وقعدت استنى الفرج
نادوا علينا وجه امتحان الكومبيوتر
وطبعا مين اول اسم اتنادى
اسم الله على النباهة
انا طبعاااا
وقعدت ويا اخويا انهالت الأسئلة
واشي زيت العربية واشي الرادياتير
وانا طبعا ماكنتش قريتهم في كراستين المرور
اللي كنت استلفتهم من احد المعارف
" بيبيعوهم ب 30 جنية ولاد الحرامية "
خلصت الأسئلة والاقيلك النتيجة ناطة في وشي
لائق 83 و تلاته من عشرة .. وانا هيييييييييييييه نجحت
الاقيلك صوت في قفايا
ههع هعع عه هه دا انت ناجحة عالحروكروك
اتلفت لقيت شاويش ما يسواش مليم واقف بيضحك
قولتله ليه ان شاء الله هو النجاح من كام
قالي من 80
بصيتله بقرف ومشيت
اقف استنى الامتحان العملي
- استطراد مهم -
انا طبعا ماعييش واسطة ولا دخلت مدرسة المرور
يعني كنت رايحة اسقط من الاخر
حطيت توكالي على الله وقولت اسقط اسقط بس اعمل حاجة
وكان اخر طموحي
اني اغمز الراجل اللي هيبقى جنبي في العربية ب50 جنيه
عشان ما يقعدش يلعب في الدواسات ويخليني الوش
حلو الكلام
لأ مش حلو .. طبعا انا كنت اول اسم ينادوا عليه
وركبت العربية وقولت بقى اعمل فيها بنت بلد وبتفهم
فروحت سألاه
قال يعني بفتح كلام
" هو اسم الكريم ايه ؟"
لقيتلكوا الراجل اتنطر كدا
وقالي الله يسامحك يا ابلة
بغض النظر عن ابلة دي
انا قولت الراجل شريف
ولو طلعت الفلوس مش بعيد ينزلني من العربية
ويعملي محضر تحري
خليكي ساكتة يابت وخليها على الله
وسكت وطلعت بالعربية
طلعة حلوة الحمد لله
ولسه بقى هاطلع فوق الكوبري
وبدور عالبنزين ولا على الدبرياج
الاقيلكوا المنيل على عينه شغال لعب في الدواسات
ادور على الفرامل مافيش ادور على ايه حاجة كله تحت
بصتله وفي سري
الله يخرب بيييييييييييييتك
هو لازم تسقطني بالعند يعني
وطبعا صوت العربية جاااب اخر الدنيا
وانا عمالة اعافر عشان تتحرك
تلخيصا للتجربة المنيلة دي
العربية خبطت مني عند الملف
ونزلت ولاقيت كل اللي واقفين بيضحكوا
بيني وبينكوا انا راخرة كنت عمالة اضحك
لأني ما اتضايقتش اوي
كنت سايباها على الله
وربنا ما بيجيبش حاجة وحشة فكنت مستريحة
جات بت ركبت بعديا
جاية معاها باباها واخوها
_ يا حسرة عليا _
اول ما قعدت راحت مطلعة 50 جنية ادتهاله في ايده
راح واخدها
انا بقى اتجننت
اه يا ابن ال .. طالما بتاخد
عملتلي فيها خضرة الشريفة ليه
بس برضه بيني وبينكو ماكنتش متضايقة
يمكن لاني كنت مبسوطة من وقت امتحان امبارح
وقولت ان فرحة تعديته هتشيل اي زعل تاني
واني حسيت ان ربنا معايا
واني بجد المرة دي عرفت اتوكل عليه
قالولي تعاليلنا بكرة تشوفي النتيجة
وانا على مين
ما انا عارفة اني هاسقط
هادب المشوار دا تاني
واكع 5 جنيه تاكسي رايح
وتلاته ونص جاي
عشان اسمع الخبر السعيد
بلوه واشربوا ميته
روحت يا ولا عالدرس بعدها
وانا داخله طبعا فاشخه بقي وباضحك
فالدكتور بيقولي ايه نجحتي
قولتله لأ غالبا هاسقط واكمل ضحك
مش عارفة كنت بضحك ليه
بس انا قضيت نص الحصة بفتكر منظر الراجل
وهو بيقولي الله يسامحك ومحموء
ومنظره وهو بياخد ال50 جنيه
البت صاحبتي بتقولي تقريبا
ربنا مش عايزك تطلعيها في سكة حرام
طبعا انا كنت قبلها عماله ألالي في
لعن الله الراشي والمرتشي
لحد ما قالولي الذنب عليهم
لانهم مش هيمشولك مصلحتك غير كدا
بس اهي جات من عند الله
انا طبعا كنت فاكرة نفسي حركة وبعرف اتصرف
طلعت نيييلة خالص
قال وبقوله اسم الكريم ايه
ههههههههههههههههههههههههههههه
بيني وبينكم انا مسكت التليفون واتصلت بالحاج
قولتله بقولك ايه
انا مش عارفة اطلع الرخصة
وهاركب العربية من غيرها
وخلاص بقى قفلوا عالسيرة دي
لحد ما ربنا يفرجها واسقط التلات مرات بتوعي
ويحولوني على مرور القاهرة
واطلعها من هناك
عقبال امالتكم عندي واسطة في الكاهرة
يلا بقى يا جماعة
اللي يعرف سكة لتطليع الرخصة يقولي
لحسن انا ابتديت اربي عقدة
وشوية هتشوفوني منكووووشة في الشارع
وبنادي عالرخصة
بس بس بس .. يا بت يا رخصة
انت يا بت
روحتي فين يا مقفصوفة الرقبة
قالتلي رايحة تجيب ورقة بوسطة
بس بس بس .. ماشوفتهاش والنبي يا حضرة الأفندي
انت يااااااابت

Labels:

 
posted by Rivendell** at 9:47 PM | Permalink | 6 الكومنتات الكريمة
Wednesday, March 21, 2007
كلنا هنموت - يـــــــارب

عش ما شئت فإنك ميت
**

**
و أحبب من شئت فإنك مفارقه
**

**
و اعمل ما شئت فإنك مجزي به
 
posted by Rivendell** at 10:55 PM | Permalink | 11 الكومنتات الكريمة
قل أدبك
متـكاظي يتـحـدث
..
..
..
..
يـا تــصــوت
..
..
..
..
..
يا تــقــل أدبـــك
..
..
..
..
..
..
قل أدبــــــــك
اضغط اللينك بالأبيض

Labels:

 
posted by Rivendell** at 1:00 AM | Permalink |
Sunday, March 18, 2007
انتحار
ركز الفكرة جيدا في رأسك

تلفت حولك في حذر

انزع حلقك من مكانه حتى لا تصرخ

اقتل نفسك ببراعة

ثم انهض وتناول عشاءك وانت تشاهد مسلسل العاشرة




 
posted by Rivendell** at 9:02 PM | Permalink | 7 الكومنتات الكريمة
Wednesday, March 14, 2007
مولاي
مولاي اني ببابك قد بسطت يدي من لي الوذ به إلاك يا سندي
..
..
تستخدم نفسك المبعثرة في الشتات لتحيا حياتك اليومية بطبيعية
قد يعتبرها البعض نوع من انواع امتهان النفس واساءة استخدامها
انت تخرج للحياة وانت مبتسم فقط لتجنب نفسك التساؤلات
وربما تكتشف انك لم تكن هنا طوال المدة الماضية وان "هناك" ليس له ذاكرة في رأسك
...
..
.
.
..
...
بنور وجهك اني عائذ وجل ومن يعذ بك لن يشقى الى الأبد
..
..
تجلس جيدا مع نفسك لتدرس توزيعات طاقتك الداخلية
تكتشف في النهاية ان الأمر يسير بالبركة
وانك قد ثقبت من داخلك حتى نفذت الى الأرض فلم يعد شئ
...
..
.
.
..
...
تحلو مرارة عيش في رضاك وما اطيق سخطا على عيش من الرغد
..
..
في معظم الوقت انت كاره لنفسك ومشكك لما تراه
تعتقد في احد أجزاء وجودك انك تمارس الدلع
وحين يبدأ هذا الجزء في السيطرة
يزيد تقريعك لنفسك حتى تخنقها تماما
...
..
.
.
..
...
من لي سواك ومن سواك يرى قلبي ويسمعه
..
..
وانت وحيد , محاط بأحباء لكنك وحيد
تشعر انك قد خدعت
فمن المفروض انك محترف
فلم القشعريرة الباردة
وقد اعتدت الاعتياد حتى صار عاديا
...
..
.
.
..
...

تعيد حسابات الطاقة مرة اخرى فتجد انك قد كرهت وجودك في الحياة وكرهت الحياة
وانك اذا كنت تتمنى الموت كل صباح
فأنت ميت بالفعل منذ قرون
...
..
.
.
..
...
هل يرحم العبد بعد الله من أحد
..
..
..
مولاي اني ببابك
مولاي اني ببابك
مولاي اني ببابك
مولاي اني ببابك
مولاي اني ببابك

Labels:

 
posted by Rivendell** at 12:49 AM | Permalink | 9 الكومنتات الكريمة
Monday, March 12, 2007
هــئــهـــئ

اكتشفت النهاردة انه فاضل 6 شهور على الأجازة .. هئهئ
 
posted by Rivendell** at 11:42 PM | Permalink | 2 الكومنتات الكريمة
Friday, March 09, 2007
Cry Me a River

Cry me a river


Julie London

Labels:

 
posted by Rivendell** at 3:41 PM | Permalink | 4 الكومنتات الكريمة
Wednesday, March 07, 2007
حفار القبور
حفار القبور
...
..
.
وحكايات مستشفى ابو جهل التعليمي
.
..
...
ومصير اسوووود مستني امثالي من البؤساء
اللينك بالأبيض

Labels:

 
posted by Rivendell** at 11:39 PM | Permalink |
Monday, March 05, 2007
سأسير دوما للأمام
سأسير دوماً للأمام
أسير في طريقي وقد ارتسمت على وجهي اعتى علامات الغباء .. مخلوطة بالكثييير جدا من الذعر
صدقوني انه مزيج لم يراه العالم من قبل , أتقدم ببطء شديد .. شديد جداا
يقولون ان في مثل هذه الظروف يفضل ان تتجاهل كل ما حولك وتصم أذناك تماما حتى تمضي الأمور بسلام
ولكن بما انها جملة بدأت بيقولون فقد تجاهلها عقلي تماما
أختلس نظرة سريعة لساعة يدي ... ماذا !! .. باقي 20 دقيقة !! .. ولكن كيف !!
أستعيد ذكريات قريبة
لِم لم أستمع لصوت العقل .. ان حدسي دوما ً في محله
هي فكرة سيئة منذ بدايتها .. ولكن لااااا لابد ان اتحاذق على نفسي لكي انتهي هكذا بلا مفر
فقدت الحساس بيداي تماما ً
ماهذا الصوت ... انه هاتفي الخلوي , كأن الموقف يسمح بصوت اضافي او بعمل اضافي
افكر جديا في الانسحاب الفوري ... وارسم بخيالي ابرع السيناريوهات
اللعنة على هذا الصوت ,, سألقيه في أقرب مكب للنفايات
دوما كانت الخاتمة هي الأسوأ ... فشلي فيها ذرييييييع
ولكن لاا
لن أتعرض لهذا الإذلال مرة أخرى .. لن أصل الى هناك الا على جثتي
.............................
.......................
أركن السيارة على جانب الطريق وبكلمات سريعة أخبر المدرب انني لابد أن ارحل الآن فلدي موعد هام
وأقفز من السيارة قبل سماع الرد , بعد شارعين أتوقف لألتقط أنفاسي
مع ابتسامة ساخرة تملأ وجهي وانا أهنئ نفسي على دهائي في الهروب منه
ومن العودة بالسيارة الى مقر مدرسة التدريب ,, فلن اضطر الى عمل المارشيدير اللعين مرة أخرى
من قال اني في حاجة اليه .. سأسير دوما للأمام

_____________________________

ياااااه لما قريته قعدت اضحك ,, كتبته من كام شهر وكان موجود على متكاظي .. بس قلت لازم احطه هنا
لأنه كان تعبير دقيق عن احساسي وقتها
بعيد عنكوا كانت ايام سوداااا بس الحمد لله الموضوع اتحسن خاالص
وبقيت باعمل مارش وباركن
وباسوق من غير ما اغمض عنيا .. اه .. احم .. انا طبعا كنت بابقى فاتحه عنيا ... ماعلينا ماعلينا
انا عملت مارشيدير في حاجات كتير من ساعتها
واتضح رغم كل تحفظاتي السابقة انها مش فكرة وحشة أبدا
وان ساعات لازم تبص وراك عشان تعرف تطلع لقدام

Labels:

 
posted by Rivendell** at 11:29 AM | Permalink | 5 الكومنتات الكريمة
Thursday, March 01, 2007
Sunflower


my favorite flower ever

Labels:

 
posted by Rivendell** at 1:12 AM | Permalink | 7 الكومنتات الكريمة