النهاردة حلمت بيك
بس زي مااكون ماكنتش بحلم , كنت حاسة بايدي على دراعك واحنا ماشيين
امبارح قعدت على كرسيك وعملت الشاي المغلي ابو سكر خفيف اللي انت بتحبه وانت عارف اني مابقدرش عليه بس شربته
من يومين وانا بطلع الهدوم الشتوي وبابعتش الدنيا زي عادتي لقيت البلوفر النبيتي بتاعك .. فاكره .. اللي اختفى فجأة دا وكنت زعلان عليه .. اعترفلك بالحقيقة اصلي لسعته بالمكوا وخفت تزعل فخبيته
بكره الصبح هأنزل اروح لعلاء البقال واجيب تمن براميلي وتمن زيتون اسود عشان يديني الباقي علبة كبريت احوشها مع اخواتها في الدرج زي ماكنت بتعمل مع ان بوتاجازنا كهربا , وارجع البيت احبشها بالزعتر والشطة واكلها بالشوكة زيك وانت عارف اني ما بستحملش الشطة
بسبوسة بتدور عليك اول ما تصحى في كل اوض البيت ولما تزهق تيجي وتلف حواليا وتطلع على رجلي وتبصلي وهي بتسأل عليك ما بتاكلش من ايدي لسه .. الظاهر مستنية ايدك
وردة كل يوم انا بحطهالك على المخدة زي العادة وبعد شوية تصعب عليا فأجري احطها في فازة عشان ما تدبلش
آه نسيت اقولك .. عملت ملوخية امبارح وما حصلش حوادث من المعتادة واتظبطت اخيرا .. غرفتلك طبق
انا هاسيبلك الجواب دا في الصندوق الخشب مع الباقيين علشان لما اجيلك نقراه سوا ...عارفة اني اتأخرت عليك .. مش بايدي .. بس حاسة اني هاشوفك قريب .. مش عايزة ماما وبابا يزعلوا
لو يعرفوا
كفاية عليك كدا .. وحشتني
Labels: adab
و الله انتي باشا
أنا كمان ساعات بيخطر على بالي أدون رسايل اس ام اس أو رسايل خطيه عشان يوم ما تيجي (هي) أقرأهالها
و ساعات أفكار لمفاجأت أو هدايا... كده يعني
عجبني أو تفصيلة تمن البراميلي و علب الكبريت و القطة...
الكاتب الناجح هو اللي يخلي القارئ يشغل دماغه و يفضل يفكر في اللي قراه أثناء و بعد ما يخلص قراءة
عفارم
:)