شيكا بيكا وبوليتيكا .. ومقالب أنتيكا ولا تزعل ولا تحزن .. اضحك برضه يا ويكا ها ها ها ها .. ع الشيكا بيكا !

Sunday, June 10, 2007
عن جمال الطبيعة والصحبة - يا قلبي لا تحزن
الطبيعة
جامع الفتح - دور عالجمال حواليك
_________________________________________________
الصحبة
على هامش الحياة اجلس انا وصديقتي كنموذج مثالي للمتعوسة وخايبة الرجا
هي : مش ماما هاتروح راس البر يوم الجمعة
انا : طب ما تروحي معاها يا بنتي
هي : والهباب الدرس
انا : يا بختها ... انا نفسي اروح اقضيلي يوم في جمصة
هي :اه يا بختها ... انا زهقت
انا : اخرسي خالص اديكي بتروحي القاهرة كل جمعة عشان الدرس
هي : يااااااساااااتر بصالي في السفرية
انا : يا سلام ما انت بصالي في طلعة المطار
انا : الا انا ما قولتلكيش
هي : اتحفيني
انا : مش (.) باباها بيقولها عايز يسفرها باريس تتفسح شوية وهي بتقوله انها ماعدتش مبسوطة من حاجة وانها مش عايزة تسافر
( .................................)
ما بين الاقواس كلام برايفت يا كماحة
اصوات ضحك ... اصوات ضحك
اصوات ضحك
اصوات ضحك
هيستريا
انا : راس البرررر هعهعهعهههعععهههععع
هي : جمصةةةةةة هههعععهعههعهعهععههع
 
posted by Rivendell** at 9:00 PM | Permalink |


16 الكومنتات:


  • At June 11, 2007 10:50 AM, Blogger Ossama

    شوفي يا دكتورة يقول المثل اتجمز بالجميز لحد ما يجيلك التين
    طبعا انتي ما تعرفيش الجميز هو حاجة كده طعمها مصدي كان الناس بيبيعوه زمان هو و النبق والدوم للعيال الصغيرين قدام بوابات المدارس
    فارضي بجمصة وراس البر الى ان يفتح الله عليكي بدوبروفنيك و برايتون تلال دوفر البيضاء وربما الكوبا كابانا على المحيط الاطلسي في ريو دي جانيرو
    او شواطيء جوا على المحيط الهندي
    على فكرة انا عامل اهداء البوست الاخير ليكي انتي وهيثم وشابورة يعني 3 مدونين باعتبرهم من احسن من يدون
    انما ايه بقى الحديث البرايفت؟؟؟
    هه
    مقاطعانا في نهاوند ليه يا دكتورة؟؟؟

     
  • At June 11, 2007 1:40 PM, Blogger Mohamed A. Ghaffar

    بكره لاتلاقى لا دى ولا دى

    تحفه الصوره

     
  • At June 11, 2007 2:05 PM, Blogger Rivendell**

    استاذي العزيز د. اسامة
    كلامك شرف ليا وحاجة تفرحني
    ومرسي جدا على الاهداء
    برايفت بقى يا دكتور وربنا امر بالستر
    :D
    انا وعيت عالدوم لكن الجميز والنبق قريت عنهم بس
    المقاربة اللي انا كنت قصداها ماكنتش عن القدرة على السفر قد ماهي عن الرضى .. رضى كل بني ادم بحاله اللي ربنا كتبهوله ...
    صاحبتي اللي بكملها والدها متوفي لكن راضية وانا والدي مش هيعرض عليا عرض مماثل مش لأسباب مادية لكن لأن الطريقة اللي ربانا بيها مختلفة عن دي وانا راضية
    مش عارفة اذا قدرت اوصل الفكرة ولا لأ
    لكن انا لسه جاية من بره والشمس رهيبة ودا اخر ما جمعت من كلام
    :) انا ما قدرش اقاطع نهاوند ابدا


    محمد عبد الغفار باشا
    شكرا بجد .. وبعدين راس البر وجمصة هيروحوا فين .. يعني واحنا نروح فين يعني
    عاااااااااا

     
  • At June 11, 2007 7:08 PM, Blogger emos

    fakarteny b wa7da babaha kan beyza3a2laha 3ashan 7'abatet el 3arabeyya el jaguar elly howa gabhalha w 2alaha el 7a2 3alaya ana kan el mafrood 2ageblek BMW zay 2ay 7akeer fe masr

    fel wa2t dah belat tamaneet en ana 2ab2a men el 7okara2 elly 3andohom BMW

     
  • At June 11, 2007 10:06 PM, Blogger تخاريف

    ههههههه

    مالها يعنى راس البر...
    حد طايل حاجه...

    والكلام البرايفت ده متخيلااه
    هههههههههههههههههه
    شدى حيلك
    :)

     
  • At June 11, 2007 11:04 PM, Blogger aboyehia

    انا فهمت المقصود يا دكتورة
    والمثل في نفس السكة
    انا كنت في برنامج الوسطية قريب على قناة الرسالة مع الدكتور طارق سويدان
    حاولت اوصل فكرة ان حكاية يا هر هر يا طر طر دي معدتش تمشي وانها خلصت من ايام حرب المعيز
    يعني ان مفيش حاجة اسمها حرية مطلقة ولا قيود لا نهائية في ضرورات وفهم لها
    الظاهر انا حمار مفهموش
    يالا امر الله
    انا كان قصدي ان الرضا اساس في السعادة بما هو متاح الى ان يأذن الله بما هو مكتوب
    بس خلاص

     
  • At June 12, 2007 4:00 AM, Blogger sporeforminghuman

    ليه الفضايح العلني ديه يا سها
    حرام يا بنتي
    بكرة نروح اطاليا و النمسا لحد ما نزهق
    وباريس اصلا بقت بيئة جدا الايام ديه

     
  • At June 12, 2007 9:14 AM, Blogger عقد الياسمين

    ههههههههه
    طيب مدام اسمك سها
    يبأه تقريبا خمنت انتي مين
    شكلنا هنطلع عارفين بعض
    ربنا يوفقكم في امتحانات الباطنة و الأطفال
    شدوا حيلكوووووا

     
  • At June 12, 2007 1:37 PM, Blogger Noony

    باريي دي اي دي اي بنتي..دي بلد ياكي ياكي خالص
    خلينا احنا في نبل رجلينا في الترعة اللي عندنا دي
    :)
    راس البر جمييييييييلة..حتى فيها مناديل بأوية على البحر تجنن
    وجمصة..أنا معرفهاش الصراحة

    بقولك غية..تيجي تقضي معايا الصيف في العين السخنة!؟

    قال برايس قال
    أنا عارة انتي لية مكنتبتيش الكلام البرايفت..عشان حفاظاً على طبقة الأوزون...صح!؟

    سلامات يا دوك
    :)
    نوني

     
  • At June 12, 2007 3:55 PM, Blogger zordeak

    هع هع هع هع

    هع هع هع هع


    حلوة صورة الجامع على فكرة

    ;)


    يا بنتى مفيش احسن من الرضااا


    مالها جمصة

    ولا رأس البر

    يا سلام على راس البر


    قال باريس قااال

    :D

     
  • At June 12, 2007 8:58 PM, Blogger إنـســانـة

    يابنتى البلد دى مافيش احسن منها بجد

    وبعدين تعالى هنا .. هو انا كل ما ازورك الاقيكى مغيرة فى البلوج
    ماترحمونا بقا ايه الناس دى
    :D

    ألا صحيح كان ايه الكلام اللى فى النقط؟؟؟؟؟
    ههههههههههههههه

     
  • At June 13, 2007 11:00 AM, Blogger Rivendell**

    ايموس
    اللهم اجعلنا من حوقراء الشوراع
    اااااااااااااامين
    هههههه



    د. اسامة
    العفو يا استاذنا دا انا اللي ماكنتش مجمعة
    الا البرنامح دا مش هيتعرض تاني


    تخاريف
    الشدة على الله
    واهي شدة وتزول
    والراجل اتخطف
    احم ... اه
    طيب هذاكر حاضر


    لووءا
    يا اختي لازم نشارك الناس قبل ما نتجنن
    كان لازم اطمن ان احنا اللي طبيعيين

     
  • At June 13, 2007 11:07 AM, Blogger Rivendell**

    عقد الياسمين
    طبعا لازم تعرفيني .. داانا شخصية عالمة في الكلية
    ههههههههه
    بهزر بهزر
    انا مش قادرة احدد انت مين بالظبط
    بس خيييير
    منوراني


    نوني
    وحشاني ومنوراني وفينك يا بونيتي
    ايه دا انت رايحة العين السخنة
    مش عايزة اقولك ياااااااااابختك لحسن تفتكريني بنق ولا بقر ولا اي حاجة من الحاجات الوحشة دي
    ههههههه
    انا كمان بحب راس البر اوي
    وجمصة عمري ما روحتها


    زوردياك
    شوفت والنبي يا خويا البلاوي اللي بتتحدف عالواحد وهو قاعد دي دا انا كنت هاقوم اضربها بالكرسي اللي هي قاعدة عليه لكن صعبت عليا اكيد الانسان اللي مش قادر يرضى بالشكل دا هو انسان تعيس ما يستاهلش غير الشفقة
    اي خودعة ... مظبطالكم الزكازيك انا


    انسانة
    خلصتي استمحاناتك ولا لسه يا بنتي
    ما انت اللي بتغيبي وانا طبعا لازم اغير الدركوريشن بما يتماشى مع احدث ختوت المودة
    هق هق هق هق
    ما خلاص بقى ربنا امر بالستر بقى

     
  • At June 14, 2007 4:21 AM, Blogger REEMOO

    باريس ايه وبتاع ايه
    يا بنتى صدقينى ده كل منظر على الفاضى
    بصى مش هتلاقى زى ميه راس البر
    ولا جو جمصه
    لفى وهترجعيلنا تانى صدقينى
    احنا عندنا بضاعه مش عند حد تانى
    اكسكلوسف :))))
    محبتى

     
  • At June 14, 2007 10:24 AM, Blogger The Groom


    اللهم لك الحمد كما ينبغي لجلال وجهك وعظيم سلطانك

    نفسي اروح راس البر تاني

    بكره جمصا قوي

    تحياتي لك من ماناساس البلد وانا رحت باريييييييييييز مرة ومش حلوة يعني من جوا المطار بس

     
  • At June 20, 2007 3:40 AM, Blogger 3abdo me7tas

    يا بختكم رايحين جمصة وراس البر انا كمان كام يوم كان معروض عليا أروح على الترعة اللى حدانا فى البلد ترعة ابو إسماعيل على الطريق الدولى لكفر البدماص
    الحمد الله رضا