تاج من مبرمج حر ... ما تقلقش هما كانوا تلات ايام امتحانات وخلصوا
أحب شخص لقلبك في الدنيا؟
أبويا وأمي اغلى بني ادمين عليا على وش الأرض ...
انسان مستعد تضحي بحياتك – ركز فى كلمة حياتك – عشانه؟
كل وأي بني آدم بحبه بجد ومن قلبي
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
الناس اللي بحسها بتخبط فيا او بتحاول تستغل كوني
- easy going -
وما ليش مطالب لكن بتبقى حالات جنون مؤقت يعني اول ما الموضوع بيتحل بنسىىىىى
ما هو اسم اجمل كتاب كتبه بشر قراته ومحتفظ به حتي الان؟
في كتب كتير جدا تندرج تحت الوصف دا لكن اقربهم ليا كتاب اسمه نفتدي أمة الرزاق لنعم الباز
اسم كتاب كتبه بشر برضة- انت متعلق بيه وبتقرأه كل فترة؟
اعداد معينة من ماوراء وسفاري باعتبرها ادمان ليا , وكتاب تلك الايام لفتحي غانم اتعلقت بيه بشكل مرضي وبقراه كتير جدا جدا
اهم جهاز منزلى انت متعلق بيه او بتستخدمه كتير؟
التكييف واالمراوح - بمناسبة الحر دا - انا كائن من ذوي الدم الحار جدا جدا جدا جدا وما بستحملش الحر بدروخ وبفصل وبابقى ولا الخرقة البالية
مكان تحس بالراحة عندما تدخله؟
برضه بمناسبة الحر اوضتي لما بشغل فيها المكيف واسيبها تسقععععع وادخل انام بعد اجهاد وحر يوم طويييل
لكن برا مناسبة الحر ... فالمساجد الكبيرة .. الواسعة اوي .. بقبابها العالية
بحس بالراحة الشديدة فيها وباحس بمدى ضآلتي .. بالذات جامع هنا اسمه
جامع الفتح
انا بحبه جدا جدا من ايام طفولتي وليا ذكريات وذكريات فيه وحواليه
وطبعا المسجد النبوي في المدينة
شىء تحس بالراحة النفسية عندما تنظر اليه؟
المطر وهو نازل يغسل في سكته كل حاجة ... والأرض الخضرا والنخيل عالي وبعيد فيها واحنا مسافرين على الطريق
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
اسكندرية في اول دخلتها واحنا ماشيين عالكورنيش والبحر تحت النظر لكن بعييد لسه ما لمسنهوش بايدينا
اجمل مدينة زرتها داخل مصر ؟
ما سافرتش كتير جوا مصر لكن اقدر اقول اسماعلية .. الحي الافرنجي فيها - او هكذا اعتقد اسمه - فيلات المهندسين الاجانب بتوع شركة الكنال زمان فيه جميلة وكمان الجناين الجميلة
لكن لو سألتوني تحبي تعيشي فين هاقول اسكندرية بلا تردد وطموحي اني انقل حياتي هناك بإذن الله
أجمل مكان طبيعي رأيته داخل مصر ؟
شلالات وادي الريان في الفيوم و بحر اسكندرية
شخصية كارتونية بتحبها؟
ساسوكي بلا منازع هو رقم واحد ..
بيتهيالي ماحدش يعرفه في مصر ولا في الخليج
كان موجود في ليبيا بس اما كنا صغيرين , كان عيل زعنن كدا وبيلعب كونغوفو وبيستعين بقوى الطبيعة
فيقول .. اونذرابون فن الكوجا تحركي يا ريااااح ... كنت مدمنة
وطبعا المحقق كونان
ومن الطفولة اللي اختفت كعبول وعبقرينو المخترع المجنون والقط المشاكس
نوع هاتفك المحمول؟
سامسونج دي 600
وبحبه جدااا وبكره الزوكيا عمىىىىىىىىىىىى
سرعة بروسيسور جهازك؟
والنبي يااخويا ماعرف بس تقريبا واحد وتلاته جيجا هرتز
عشان ما فتش يعني .. الله اعلم
حجم ذاكرة –هارد- جهازك؟
بتاع 180 جيجا وفي هارد يو اس بي 40 جيجا
المساحة التى تشغلها المواد الاسلامية على جهازك؟
5 جيجا تقريبا
نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
!!!!!!!!!!!!
أهم هدف انت واضعه لحياتك الآن؟
merely survival
just to make it to the next level
مواصفات فتى الأحلام بالنسبة لك؟
دماغ كبيرة بشكل يقنعني وحط تحت يقنعني دي 12 خط
طيب جدا وهادي وصبور
يتقبل نزواتي الطفولية ويعيشها معايا
متواضع ومتحدث لبق
دي المواصفات الخاصة دا طبعا بخلاف العام المتعارف عليه
صف ما يأتى:
شعورك لما بتسمع كلمة مصر ؟
الامتعاض والحزن , في يوم من الايام كان بيبقى رعشة شوق وحب
بس دا كان زمان
شعورك لما بتسمع كلام عن اليهود؟
دمي بيغلي وبحس بالعجز والغيظ
شعورك لما بتشوف ظابط شرطة؟
بفكر في اهله .. ابوه وامه واخواته
شعورك لما بتشوف الكناس العجوز فى الطريق؟
بابقى عايزة انزل اساعده .. بابقى عايزاه يرتاح
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
ما بحكمش عليه وبابقى مش عايزاه يحكم عليا .. كل واحد حر يعمل اللي هو عايزه
احساس يراودك فى اشارة مرور مغلقة بسبب مسئول كبير؟
ربنا عالظالم والمفتري وابن الحرام
بسرح في دماغهم بتبقى شغالة ازاي
يعني هما عارفين ان في يوم قيامة وانهم هيقفوا قدام رب كريم يسألهم ولا لأ
ولو عارفين مصهينين يعني ولا مش هاممهم
------------------------------------------------------------------
معلش التاج دا هيموت عندي ومش هامرره لأي حد لان عادة ماحدش بيرد الا معدودين بس
بس طبعا يا مراحب لو حد عايز يجاوبه يدخل يقولي بس عشان اقرا اجاباته
-----------------------------------------------------------------
تحــــديث حديث جدا
قررت رفع حظر التجول عن التاج وهمرره للبشر التالي اسمائهم
اسامة سول
شيماء هارت مايند اند سول
د. اسامة القفاش لو وقته يسمح
نووني ومحتاجاتها
لوجيك مع انه ماردش عاللي فات
عبد الله مقبرة التاجات
لووءا مع اني عارفة انك ما بتدخليش
محمد عبد الغفار مقبرة التاجات برضه
تامر نبيل
سفاح كرموز
الانونيماس لو حب يقول هو مين
د. تخاريف العزيزة
فؤاد انا عارفة ان مبرمج مررلك التاج دا فعلا
Labels: mE
موضوعية وحيادية
أحيكي على طريقة تفكيرك
بجد عجبتيني مووت
خدي بالك من نفسك يا قمر
:)
نوني