شيكا بيكا وبوليتيكا .. ومقالب أنتيكا ولا تزعل ولا تحزن .. اضحك برضه يا ويكا ها ها ها ها .. ع الشيكا بيكا !

Monday, May 28, 2007
ذكريات لابد من الغوص فيها
في أسوا لحظات ضعفك كإنسان عقلك الباطن بيرجعك لمواقف قوتك كنوع من أنواع الحماية والتثبيت
زي ما انتم عارفين انا روحت احج السنة دي , كانت فرصة غير متوقعة على الاطلاق
قرار سفري كان جه قبلها بمدة بسيطة جدا
وبعد ما رجعت حاولت اتكلم واحكي لكن ما قدرتش ابدا .. ولحد دلوقتي مش عارفة ليه , حاولت كتير جدا لكن الكلام كان بيهرب مني
تقريبا لازم تبعد عن الحدث عشان تقدر تشوفه كويس , عامل زي كتابة التاريخ
انا هاحكي فلاشات من الرحلة الطويلة في بدايتها القصيرة في نهايتها اللي عدت عليا
_______

فلاش واحد
المكان : مطار القاهرة
الزمان : الساعة 1 صباحا
انا قاعدة على كرسي في الكافيتريا لوحدي , باسمع سورة طه بصوت المنشاوي ومحدقة في الفراغ
كان جوايا خايف لابعد حد , اللي يعرفني يعرف عني اني متحدثة لبقة جدا في المايكروفون .. حفلات .. ندوات .. دايما موجودة عالمسرح بتكلم مع الناس قدامي وببراعة تامة
ماحدش يعرف اني خجولة جدا جدا واني بابقى بزق نفسي على الكلام
بابقى قوية وبواجه خوفي


_______

فلاش اتنين
المكان : طيارة خطوط االعربية - انا لسه بدخل الطيارة
الزمان : الساعة 2 ونص صباحا
بسبب القرار المتأخر اني أحج ماكانش في مكان على الخطوط السعودية او المصرية , فاضطريت اخد رحلة طيران العربية وانزل ترانزيت في البحرين , واخد بعدها طيارة تانية للدمام ... الرحلة كانت واخدة طول الليل
وبما اننا كنا قبل الحج بايام معدودة كانت كل الطيارات الكبيرة مسحوبة على الطريق من والى جدة وما تبقاش غير الطيارات الصغير
الطيارة ماكانتش صغيرة .. كانت اتوبيس جوي طائر ... صوت صريرها كان عالي ومزعج
وطبعا بما اني كنت مسافرة لوحدي كنت قلقانة انا هيبقى جنبي مين
وانا داخلة لقيت مكاني بين أخين – الطيارة زي الاتوبيس – يعني ما فيش مكان بين الكراسي
كنت هاعيط بلا ادنى مبالغة ... ماحدش هيحس بيا الا بنت بتسافر لوحدها وعارفة يعني ايه القلق دا .... انك تقعدي جنب واحد غريب ممكن يبقى اي حد في الدنيا
للتوضيح يعني انا من النوع اللي بيمشي حاله دايما وما بيطلبش من الناس حاجة وبيستحمل وخلاص
لقيت نفسي بتكلم وبطلب منهم يسيبوني عالحرف , الاتنين كانوا متعاونين جدا , وبسبب المسافة العدمية بين الكراسي اضطريت احط مخدة بيني وبين اللي جنبي وافضل مشدودة طول الوقت لحسن تقع
ماقدرتش انام زي ماكنت عايزة - انام ازاي يعني - فضلت صاحية باسمع سورة طه وادعي ربنا يفرجها
كنت قوية كفاية اني اعمل اللي انا عايزاه


_______

فلاش تلاتة
المكان : مطار البحرين
الزمان : الساعة السادسة صباحا
انا بحوم في أرجاء المطار , خايفة لو قعدت على كرسي انام من التعب والطيارة تفوتني
اخيرا جدا قعدت على كرسي قدام بوابة المغادرة
وبرضه محدقة في الفراغ اللا نهائي وباسمع سورة طه
كان عقلي ابتدا ينهار من عدم النوم لمدة تلات ايام متواصل
لكن كنت قوية وفضلت صاحية
_______
فلاش اربعة
المكان : اتوبيس هينقلني انا وامي من الدمام للمدينة
الزمان : تاني يوم وصولي واستكمالا لخط الاربعة ايام بلا نوم
والدي ماكانش معانا لظروف معينة وسافرنا مع رحلة فيها مجموعة من الاطباء من زملاء بابا ومن قاطني كامب الدكاترة بتاع المستشفى اللي هو محل اقامتنا هناك
من اول دقيقة الدكتور المبجل مشرف الرحلة اوضح تماما انه مش هيشيل مسئوليتنا وانه مالوش دعوة بينا
اللي غاظني اوي وقتها اننا ماطلبناش منه حاجة وما كناش هنطلب طبعا
كان تكالنا على الله


_______

فلاش خمسة
المكان : المدينة المنورة
الزمان : تاني يوم وصولنا
انا على السرير درجة حرارتي اربعين وشي هينفجر من الاديما والفلاشينج وماما قاعدة جنبي عنيها مدمعة مش عارفة تعمل ايه ... لما لاقيتها كدا قومت من السرير وقعدت اضحك واطنطط لها في الاوضة عشان ما تتخضش .... كانت صعبانة عليا اوي ... لاني عارفة هي قد ايه حساسة وقلبها رهيف
لكن الوضع كان فوق احتمالي ووقعت
كلمنا بابا اتخض وبعدها قعد يهدينا وقالنا على ادوية نجيبها
ماما دكتورة هي كمان , لكن اعصابها ما استحملتش وكانت حاسة بالعجز , كنا لوحدنا في مدينة غريبة وفي السعودية – اللي هي بلد غير فريندلي مع الستات اطلاقا – ومافيش حد ممكن نلجأ له الا ربنا
كان نفسي اوي اصلي الفجر في المسجد النبوي .. كنت مشتاقة للحظة دي من سنين - ماكنتش هاتنازل عنها مهما حصل - ونزلنا صلبنا انا .. وامي ومن رحمة ربنا بينا الاوتيل كان قدام الحرم بالظبط
وبعد صلاة الفجر ,كان لازم ندور على مستشفى اجيب منها الدوا ونتأكد فيها من تشخيص حالتي و بعد ما مشينا على طول البقيع نسأل كل الناس على أقرب مستشفى لاقيناها بعيدة ولازم ناخد تاكسي –و ستات في السعودية ياخدوا تاكسي لوحدهم دي خطوة جبارة
حالتي النفسية كانت وحشة جدا حسيت بالعجز .. وحسيت بقيمة ابسط حاجة بعملها من غير تفكير .. المشي
كانوا 300 متر من المعاناة .. عدوا في سنين
لكن ربنا كرمنا بتاكسي مع ان الساعة كانت 6 صباحا والبلد نايمة , ركبنا واحنا بنقول يارب
كنا خايفين من حاجات كتير .... الخوف كان هو سيد الموقف .. الخوف حتى الهلع
خفت اموت قبل ما احج .. خفت ما اقدرش اكمل ونرجع .. خفت من السواق الغريب ومن البلد الغريبة حتى لو كانت المدينة المنورة
... مع وصولنا المستشفى كنت انا وصلت لأقصى استطاعتي احنا كنا رايحين اساسا عشان الدوا ... حالتي كانت مشخصة نفسها .. كان نوع شرس من الانفلونزا الاسيوية لاقى جهازي المناعي مضروب من الاجهاد الشديد والضغط العصبي فعاث فسادا
وخلى رجلي ما تشيلنيش
كان اليوم دا استكمالا لليوم السادس بلا نوم وبعد 16 ساعة من القعدة على كرسي في الاتوبيس
......................................................................................

ماعنديش وقت اكمل دلوقتي هاكمل لما ربنا ييسر .. لكن يوم ما دخلت الحرم في مكة وشوفت الكعبة كنت في أذل حالاتي لله .. كنت ذليلة وضعيفة ومكسورة ... حسيت ان ربنا كان بيهيأني للدخلة دي
دخلت وانا على كرسي بعجل
يتبع
 
posted by Rivendell** at 12:03 PM | Permalink |


18 الكومنتات:


  • At May 29, 2007 5:23 AM, Blogger orthos

    لا حول ولا قوة الا بالله
    ده انتى عانيتى يا بنتى

    المؤمن مبتلى .... سبحان الله

    كملى بجى

    مبحبش حد يقطع كلام فى النص

    مستنى باقى الموضوع
    :)

    سلام

     
  • At May 29, 2007 7:24 AM, Blogger Reemo

    بجد انتى ثوابك عن ربنا كبير
    لانك عانيتى كتير علشان تحجى وأكيد ده ليه ثوابه عندربنا
    أهم حاجه انك دلوقتى بخير الحمدلله
    اسلوبك فى السرد شدنى جدا
    مستنيه اقرى باقى الذكريات
    تحياتى واحترامى

     
  • At May 30, 2007 12:33 AM, Blogger zordeak

    انا فاكر انك حكيتيلى عاللى حصل ده

    وقلتلك ان فعلا ربنا كان بيهيأك لمقابلته بالصورة دى

    علشان تحسى بنعمته عليكى وتحسى بالضعف قدامه

    مستنيكى تكملى

    اسلوب الحكى السلس ده عاجبنى جدا

    :)

     
  • At May 31, 2007 12:59 AM, Blogger Rivendell**

    اسامة
    الحمد لله .. كل دا خلاها رحلة مميزة بجد وذكرى مش هتروح ابدا




    ريموو
    منوراني يا جميل
    ربنا يكرمك يارب وعقبالك انت كمان



    زوردياك
    مرسي مرسي


    هكمل ان شاء الله في اقرب وقت
    ربنا يعين بس

     
  • At May 31, 2007 4:15 AM, Blogger رينـــــــــــا

    يااااااااا
    تعرفى اد ايه احساس وصلنى ان ربنا بيحبك
    المرض بيكون تكفير للذنوب
    لو حته شاكه
    تخيلى بئا انتى تعبتى فى السفر
    ومرضتى
    وكمان بتحجى
    ماشاء الله بجد
    ربنا يكرمك ويزيدك من فضله
    كل حاجة بتقربنا من ربنا فضل

    اسلوبك رائع وشدنى
    ومستنيه اعرف باقى الرحله الجميله دى
    رغم بعض الامها :)

     
  • At May 31, 2007 11:39 AM, Blogger Tamer Nabil Moussa

    الف سلامة عليكى

    وتقبل الله منكى

    تحياتى

     
  • At May 31, 2007 4:19 PM, Anonymous Anonymous

    سينا رجعت كاملة لينا ومصر اليوم في عيد :)
    أخيراً حأقول رايي وأعبر عما يجيش في صدري كأنونيموس :)
    فعلاً ما أخذ بالقوة لا يسترد إلا بالقوة :) فأنا منعت من التعليق ولكن بالإصرار والكفاح والمثابرة وعدم اليأس استطعت استرداد حقي المغتصب في التعليق بحرية وسلاسة ودون أدنى إعاقة :)
    وكما قلت سابقاً فالعجلة تحركت ولن يستطيع أحد إيقافها :)
    طبعاً ليس هنالك داع للإنتقام الفردي بمنع التعليق من جديد :)
    بالنسبة للبوست محل التعليق أود أن أبارك لك على حجك :) وأن أشيد بجمال سردك للموضوع وبساطة الكلمات مع نفاذها كالسهم في القلوب :) أظن الحته دي جامدة وصورة نثرية نبتكرة :)

    المهم أشكرك جزيل الشكر مع طلب بفتح باب التصويت على تغيير التمبليت عشانه طول والمفروض أنه ما يقعدش أكتر من مدتين وكفايه عليه قوي كده عشان العيال بقى عندها 15 سنه وشعرهم أبيض من اللي بيشوفوه من التمبليت ده :))))

    كفايه يا سهى :)

     
  • At May 31, 2007 9:59 PM, Blogger Noony

    يااااااااااااااااه
    ربنا يكرمك يا رب
    بس تعرفي التعب والمعاناة هناك ليها طعم تاني
    حتى الخوف هناك غير الخوف هنا
    بجد بغبطك
    من رحمة ربنا انك عييتي وانتي هناك...عشان ثوابك يكبر

    ربنا يوعدنا يا رب
    :)
    مستنية البقية
    نوني

     
  • At June 02, 2007 8:35 AM, Blogger Eric Matt


    كله عشان الحج و الرسول صلى الله عليه وسلم يهون

    :)

    تحياتي لك من ماناساس البلد وألف حمدالله على سلامتك يا حجة

    :)

     
  • At June 02, 2007 8:42 AM, Anonymous Anonymous

    أنا سعيد للغاية إنني هنا .بيذكرني أسلوبك بكاتب مصري اقرأ له بشراهه و أتمنى يكرم و مرة واحدة قبل وفاته وهو الكاتب أحمد توفيق ..وهو طبيب مثلك

    سعدت باضافتي لقائمة مدوناتك الصديقة و سعيد أكثر لأنني هنا

    أنا من المدينة و المرة الثانية لو حتيجوا سنقوم بالواجب و أكثر ..ا}يدك بالكلام الذي ذكرتيه عن بلدي صراحة هو حقيقة للأسف لكن بالمدينة تحديدا تقبل أهلها للآخر جيد وقد لايشعر الزائر بغربة كبيرة ربما لأن نفحات المسجد النبوي تغمره و ربما لبساطة أهلها ..مرة ثانية شكرا لك

     
  • At June 03, 2007 12:58 PM, Blogger تخاريف خاصه!

    برغم الم اللى اانت بتحكيه..
    بس بتهيألى كان الم له مذاق خاص...
    :))))

     
  • At June 03, 2007 6:12 PM, Anonymous Anonymous

    بجد مش عارفه اقوللك ايه
    عشت معاكى لحظه بلحظه لحد مافى الاخر دموعى نزلت
    ان ربنا يوفقك للزيارة دى يبقى مفيش بعد كدة
    صحيح تعبتى بس على ما اسمع .. ان ده كله تخليص ذنوب
    يعنى بجد ربنا يكرمك ويوفقك وتحافظى على ثوابك ده
    ويرزقنا الدعوة الشريفه دى
    ياااااااااااااارب
    سلامى
    :))

     
  • At June 05, 2007 2:58 PM, Blogger Rivendell**

    رينا
    منوراني
    وربنا يكرمك يارب



    تامر نبيل
    ربنا يخليك



    انونيماس
    :)


    نووني
    طعم تاني خالص انا باتمنى اتعب التعب دا وقده مليون مرة كمان بس ارجع تاني


    جرووم
    الله يسلمك وعقبالك انت كمان


    ابو حسان
    انا اللي مبسوطة جدا لاني لقيت الموقع بتاعك بجد المعلومات اللي عليه شيقة جدا جدا
    وكلامك عن المدينة صحيح فعلا بس لما تبقى لوحدك بيبقى الوضع مختلف شوبة .. المدينة المنورة ليها جمال رهيب وفعلا اهلها من احسن الناس في التعامل معاهم بجد



    تخاريف
    مختلف جدا
    عالمة ايه في الامتحانات يارب خير



    شيماء
    يااااااااااااارب
    يا حبيبتي ربنا يكرمك
    تحياتي

     
  • At June 06, 2007 8:09 AM, Blogger Shower-Mirror

    يالا بقى كملى بقية الحكايه ...

    اصلى عارف احساس رؤية الكعبه ده كويس

    عشان كده انا متشوق اسمع باقى الموضوع

     
  • At June 06, 2007 12:01 PM, Blogger Ossama

    دكتورة فكرة ان المعاناة تدريب واعداد جميلة وفيها
    مسحة صوفية رائعة
    ربنا يتقبل منك
    على فكرة انا برضه حصلتلي تجربتين مشابهتين واحدة لما عملت عمرة وواحدة في السويد
    يمكن ابقى اكتب عنهم بعدين
    خالص تحياتي
    اسامة

     
  • At June 06, 2007 12:27 PM, Blogger أخف دم

    ده كله لا يساوى مجرد انك كنتى عند الكعبة وممكن تلمسيها بإيدك ... دعواتك اروحها واموت هناك ..
    وبعديم من كتر التعب اللى قلتيه أنا توقعت انك أول مارحتى عند الكعبة ورايحين تبدأوا الطواف من كتر التعب نمتى لما هما خلصوا..
    ربنا يقدرك وكله فى ميزان حسناتك

     
  • At June 06, 2007 8:35 PM, Blogger Rivendell**

    شاور
    فينك ... نورتني


    د. أسامة
    ياريت حضرتك تكتب عنهم ... كلامك نيشان بالنسبالي


    اشرف
    يارب يارب تروح يااشرف يارب
    اديك هتقرا اللي حصل

     
  • At June 07, 2007 7:08 AM, Blogger Eric Matt


    مقدرتش أكمل قراية لاني مش عايز اعيط قبل مانام

    انا بتلكك في العياط

    ربنا يكرمك يا رب وادعيلي يا حاجة

    :)

    تحياتي لك من ماناساس البلد