التاج من فؤاد
اسم مدونتك؟
whateVer
زماان كانت تجربة فعالة .. كانت تعبير عن روحي لما كانت متوثبة بالأمل - نفسي اعرف كانت بتنط تروح فين دي - كانت فلسفتي ان كل حاجه بتمر عليا لازم اطلع منها بحاجه استفيد منها وبعدين لما الفلسفة اتغيرت واقتنعت تماما ان الحياة في مجملها مش الغرض منها انها تبقى كويسة وان الاساس انها تبقى دار شقاء وان فعلا فعلا فعلا مافيش حاجه اسمها امل ولا ان بكره كله هيبقى كويس - اساسا مافيش بكرة - وان كل دا مسكنات احنا بنديها لنفسنا عشان نستمر قررت اغير الاسم .. لاسم يعبر عن موقفي الحالي واللي يتلخص انها مش فارقه , نضحك ما نضحكش نعيط ما نعيطش نروح او نيجي مافيش حاجه كويسة هتحصل .. بس
هل فكرت في إغلاق المدونة.. والسبب؟
لأ اطلاقا .. والسبب انها بقت بيتي دلوقتي .. بهرب ليها وفيها من حياتي
صورتك فى المدونة ..رمزيتها ؟
صورة قطة , وانا بعشق القطط حاجه كدا جايالي في الجينات ولأني خايفة اخد خطوة تربية قطط لأني حاسة ان الموضوع كبير عليا لأني اساسا وغالبا تايهة .. والقطة في عينيها استفهام وعاوجه راسها بدهشة وانا هافضل دائما وابدا مستغربة من اللي بيحصل في الحياة حوالية
طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
بتكلم عني انا .. مزاجاتي وحكاياتي واخباري .. تقدروا تاخدوا البلوج دا على انه مكالمة تليفون طوييلة بحكي فيها ااخباري لواحدة صاحبتي ما شوفتهاش من زماان .. يعني مافيهوش حاجه تهم حد
لماذا تدون أصلا ؟
عشان اتكلم
أحلى جملة قيلت لك فى وصف مدونتك ؟
ماحدش قالي حاجه عن المدونة ككل يمكن التيمبليت عجب ناس او ان موضوع يلمس حد لكن ككل لأ
التعليقات بالنسبة لك ..أهميتها ؟
تحديث .. معلش سوء الحالة النفسية هو اللي خلاني اقول اني مش مهتمة بالكومنتات لكن بالعكس الكومنتات مهمه جدا ليا لان معناها ان في حد سامع اللي انا بقوله وانه حتى لو انا شايفه اني هبله في حد شايف ان كلامي مهم
أحلى بوست كتبته ..ضع اللينك ..ثم اذكر لماذا ؟
كلبوظة انا .. لانه كان الخطوة الأكبر في اني اشيل الاستيجما من على الموضوع دا بالنسبالي ,هو انا من قبله وانا بقول اني تخينة وماعنديش مشاكل بس دي كانت اول مرة ابعبع باللي في نفسي كله كدا
تحديث .. والبوست دا كمان كان من اصدق ما كتبت تـــــوهة
أفضل مدونة قرأتها ..يمكن اختيار عدة مدونات ؟
ناس كتير جدا .. وعموما انا اللي بحبه باعلق معاه على طول .. في ليستة موجوده اهي بكل اللي بحبهم
أفضل بوست قرأته ..يمكن اختيار اكتر من لينك ؟
سوري انا هزوزغ من الاجابة لاني اساسا بني آدمة زهايمرية ومش عايزة حد يزعل مني
هل خسرت صديق بسبب كتابة هنا ؟
لع بس في حاجات معينة لو ناس معينين قروها اكيد هخسرهم
حد قل ادبه فى التعليق ..ايه رد فعلك ؟
لع .. ولو حصل يبقى كله في الدليت .. انا اساسا مابحبش قلة الأدب .. ما بحبهاش بالزيادة عن الطبيعي
أسوأ مدونة ..الاجابة اجبارية ..يمكن اختيار عدة مدونات ..هما كتير اصلا
مدونات الناس اللي دمها تقيل وبتستظرف ومدونة اللادينين الغير محترمين لما بيتمسخروا على الدين بسفالتهم المعتادة
أسوأ بوست ؟
هو في واحد في دماغي بس انا مش هاحط اللينك عشان بس ماموعش نفسكو
أمرره لمين بقى ؟
لكل الناس الحلوة اللي اعرفهم ..
معاذ
المتكاظين
انسانة
سبور هانم
أنا محتفظ برابط المدونة بتاعتك في المفضلة من أيام ما كان اسمها تجربة فعالة .. وما سبقش ليا إني علقت هنا قبل كده
المهم أنا كنت عايز أقول إن مدونتك جميلة جداً .. وفيه بوستات ممتازة عجبتني جداً زي بوست هواجسي الحزينة .. اللي حطيت رابط ليه في مدونتي
على فكرة .. أنا ما حطيتش رابط مدونتي عشان ما تقوليش إني منتظر تردي التعليق عندي
تحياتي