شيكا بيكا وبوليتيكا .. ومقالب أنتيكا ولا تزعل ولا تحزن .. اضحك برضه يا ويكا ها ها ها ها .. ع الشيكا بيكا !

Saturday, February 17, 2007
هواجسي الحزينة
بخاف على اللي بحبهم اوي .. وبيبقى نفسي اشيل عنهم كل حاجه .. مااستحملش انهم يتالموا ولو لحظات .. باحس ان قلبي بيتعصر عليهم .. كل ذرة وجع بتتنقلي وباتشربها حتى الموت .. ولما بحس بالعجز قدامهم بابقى مخنوووقه .. مخنوقه اوي ...
هي يمكن انانية مني .. لكن انا عايزة ابقى اول واحدة تموت في اللي بحبهم .. مش هاستحمل رحيلهم المفاجئ عني .. حياتي ماحصلش فيها وفيات خطيرة قبل كدا .. اكيد في ناس اعرفهم ماتوا .. بس ماكنتش اعرفهم بجد .. يعني جد من هنا على خال ام من هناك .. كنت صغيرة اوييي ..مااوعاش اوي .. لكن الرحيل هو الكابوس ... يوم ما خال ماما توفى سافروا كلهم العزا وانا كنت بتاع 6 سنين كدا .. وماكنتش اوعى على اني شوفته اصلا .. بس قعدت اعيط .. انفطرت في العياط مش عيطت بس ... لسه فاكراني وانا قاعده عالكنبه بعيط جنب خالتي اللي كانت قاعده بينا ..
وانا عندي 10 سنين كدا واحدة زميلة اخويا في الفصل ماتت .. كانت مريضة بالقلب .. وانا كنت عمري ما شوفتها قبل كدا .. بس اول ماعرفت قعدت اعيط برضه ... انفطرت في العياط
ساعات افكر .. لو مكتوب حد من اللي بحبهم يعيا يبقى احسن اني انا ابقى مكانه .. عشان ماحسش بالعجز قدام المه .. مستعده للتبادل دا بشكل فوري ومن غير تردد .. مش مهم العمر ولا الصحة ولا اي حاجه عندي .. لكن المهم ان مافيش حاجه تمس الناس دي
ساعات امسك صورة جدي اللي مات وانا عندي سنة واقعد اعيط .. بابا قالي انه كان روحه فيا , كان لازم هو اللي يأكلني .. يحطني في العربية وياخدني يتمشى بيا وبعدها يقعد على اي كرسي في الشارع ويأكلني
باكره احساس العجز .. عشان كدا باحس بخيبة الامل كل ما دراستي بتعلى .. باعرف ان حاجات كتير مالهاش حل .. امال انا هاساعد الناس ازاي .. ماقدرش اخد تخصص اشوف الناس فيه بتموت او عيانه وابقى عاجزة قدامهم .. اورام .. لأ , أطفال .. لأ , كل حاجه في الطب هتبقى لأ .. انا هاروح اشتغل رقاصة احسن
دايما بسال ... انتم حاسين بايه دلوقتي ... دايما .. لو تعرفوا بحبكم قد ايه .. كل الغاليين عليا .. انا بحبكم اوي .. يمكن باغلط في حقكم ويمكن بتغلطوا في حقي .. لكن بحبكم جداا جداا .. ربنا يخليكم ليا
 
posted by Rivendell** at 4:00 AM | Permalink |


6 الكومنتات:


  • At February 17, 2007 12:26 PM, Blogger كراكيب نـهـى مـحمود

    جميلبة مشاعرك لكن مرهقه اوي
    بالراحة على نفسك
    وخليكي فاكرة ان مش قلقنا على اللي بنحبهم هوه اللي هيخليهم امنين من اي حاجة
    كله مكتوب على الجبين استمتعي بالوقت والناس الموجودين دلوقت
    تحياتي على رقة مشاعرك ولغتك

     
  • At February 17, 2007 7:27 PM, Blogger مُزمُز

    إنتي بني آدمة جميلة ونادرة

    خليتيني وأنا بقرأ حاسس بخسة شديدة جوايا

    الله يسامحك

     
  • At February 19, 2007 8:02 PM, Blogger khaled

    انا مع كراكيب فى ان مش مجرد القلق هو اللى هايخليهم فى امان
    بس دى مشاعر جميلة و رقيقة
    كلامك بيمس القلب
    سؤال اخير
    هو انتى ليه خافية الكلام؟ يعنى ليه مختارة شكل مدونتك كده الخلفية سودة و الكلام اسود؟
    مقصودة و الا مش مقصودة؟

     
  • At February 19, 2007 8:26 PM, Blogger Rivendell**

    نهى


    انا عارفه بس ساعات القلق بيبقى خارج عن السيطرة خصوصا لما بيبقى في حاجه بتحصل فعلا

    وربنا يكرمك يارب


    معتز

    والله لا نادرة ولا بتاع .. لو اتحطيت في الامتحان هتلاقي نفسك حاسس نفس الاحساس ناحية الناس اللي بتحبهم بجد



    خالد
    ربنا يكرمك .. بس البلوج خلفيته بيج مش اسود ممكن يكون مش بيحمل معاك كويس

     
  • At February 19, 2007 9:10 PM, Blogger مُزمُز

    والله

    والله

    والله

    وأنا متأكد جدا جدا من اللي بقوله ده

    أنا مش اسمي معتز

    الاسم ده أساسا ده بيزعجني جدا جدا جدا

    المفاجأة إن اسمي طلع مش معتز أبدا وأنا أساسا قايل اسمي عندي كذا مليون مرة بس

    اسمي معاذ

    شفتي المفاجأة؟

     
  • At February 19, 2007 9:13 PM, Blogger Rivendell**

    يا كسووووووووووووووفي ومنظري الزبالة

    والله
    والله
    والله

    ان اعرفت انه معاذ بس معتز لززززززق في راسي ومش عارفه اطلعه وانا شخصية زهايمرية الى حد مااا .. احم .. الى حد كبير ....

    يا كسووووووووووفي


    يا معاذ

    معاذ احلى احسن