شيكا بيكا وبوليتيكا .. ومقالب أنتيكا ولا تزعل ولا تحزن .. اضحك برضه يا ويكا ها ها ها ها .. ع الشيكا بيكا !

Friday, September 08, 2006
كلابيظو


انا كلبوظه ... حقيقه بقولها في كل مكان ... وكلبظتي دي بتخليني اتمنى اختفي من الوجود ... اتحول للوح قزاز شايف الناس وماحدش شايفه ..... عامله نفسي بتاع ودايما بتكلم عن ازاي انا تخينه .. ساعات اقول مش هاممني وساعات اتريق .. اي غبي هيقول اعملي دايت مش مشكله يعني .. هيبقى غبي فعلا .. ودا سب علني مقصود ...... مش عارفه البس دي حقيقه .. يوم شرا اللبس بيبقى مأساة مافيش مقاسي في اي حاجه , ساعات كنت اروح لاصحاب المحلات واقولهم مافيش مقاسي ليه البلد فيها بقاليظ زي ما فيها رفيعين .. السكر والضغط وراثه في العيله وجاينلي جاينلي لو وزني مانزلش ... ومش راضيه برضه اظبط اكلي ... انا عارفه ان التخان بيقولوا ما بناكلش بس برضه بنتخن لكن انا باكل من برا كتير ... وتوصلني سلسله افكاري للحقيقه المرة انا ماعنديش ارادة عشان انقذ نفسي ... وكل ما افكر في كدا اكره نفسي وكل ماكره نفسي ادور على نمرة اي مطعم اطلب منه اكل عشان افرفش .. وقطمة والتانيه واكره نفسي اكتر اني باكل والتالته والرابعه بطني توجعني لان اكيد الاكل مهما كان منين ماهواش نضيف ...واتعب ... وارجع تاني يوم لنفس الدايرة ... اعمل الخطط واقول هابطل .. اول ما افكر كدا هاقرا قرآن عشان انسى .. وماانساش وارجع الف تاني .. افكر اشجع نفسي واقول خسي عشان تعرفي تلبسي .. الاقي الرد جاهز انا مش هاتشيك عشان اصطاد عريس ... الرد اللي بعديه جاهز انت بتلبسي عشان نفسك ... واقعد احلم باليوم اللي هاخس فيه واطلع كل طاقتي في الحلم ..وارجع اكل تاني لاني لما بحلم كأن كل حاجه انا حلمت بيها بتبقى حصلت خلاص .. اقول خسي عشان المرض والعيال التمانيه اللي انت عايزاهم ... دافع كويس لكن ماودانيش اي حته ..... ارجع افكر انا كدا ومافيش غير كدا عندي مافيش حل تاني .... لكن للاسف السلام النفسي دا راح من حوالي سنه ... ومن ساعتها اخس شويه وارجع اتخن تاني ... ورايحه جايه عالطريق السريع للاكل يومين من الاضراب الكامل عن الطعام من كتر ماببقى مش طايقه نفسي ويومين من الاغراق التام في الاكل من غير تفكير ..... وبرضه هافضل كلبوظه .. ابص لديانا كرزون واحسدها انها خست واقول دا انا نصها ازاي مش عارفه اخس .. وارجع ابص لنفسي واقول يا موكوسه ماعندكيش ارادة واكره نفسي واررررجع تاني للاكل .... وهلم جرجير

Labels:

 
posted by Rivendell** at 6:52 AM | Permalink |


11 الكومنتات:


  • At September 09, 2006 11:35 AM, Blogger sporefroming-human

    يالهوي

     

  • At September 09, 2006 11:44 PM, Blogger Rivendell**

    يخرب بيييتك ..... هو دا الرد اللي مكلماني تقوليلي اقريه

     

  • At September 10, 2006 4:50 AM, Blogger zemos

    يخرب عقلك... أتاريكي بتقولي مفاجأه و معرفش ايه

    بصراحة... أحييكي (مش هاقول لجرأتك) لكن هاقول أحييكي لقوتك

    و أتوقع ان شاء الله... ان البوست ده خطوة أولى... حتى لو كانت بعيدة زمنيا عن الخطوة الحقيقية... بس خلاص

    و ختاما....احترامي لبرج الأسد

     

  • At September 23, 2006 1:29 AM, Anonymous Anonymous

    ممكن اسأل سؤال واحد انتى عندك كام سنه ؟؟؟؟؟ وانا عندى الحل المثالى .. متقلقيش ومتشيليش هم عارفه انتى خليتينى ابكى بجد انا بكيت من كلامك يمكن انتى كتبنى الكلام ده من جوه جوه جواكى وعشان كده انا بكيت متقلقيش بجد لو عايزانى معاكى انا معاكى ولو عايزانا كلنا معاكى كلنا معاكى متقلقيش هاتبقى زى ما انتى عايزه يا صاحبه اصدق مشاعر اخوكى واحد من الناس

     

  • At September 24, 2006 1:34 AM, Blogger Rivendell**

    عزيزي واحد من الناس انا عندي 21 سنة زي ما هو مكتوب في بروفايلي .. اشكرك جدا على مشاعرك الحسيسه دي ... بس انا الموضوع مش ازمة عندي كدا لدرجة البكاء .... انا زي ما انا عايزة ... عديت مرحلة الزعل اني كلبوظه وعايشة دلوقتي بصفاتي اللي انا عايزاها ... بهبلي ولساني الطويل وانعدام اللياقة الاجتماعية والفشل التام في اصطناع اي نوع من انواع الالاطة ...... عارف ليا جملة بحبها اوي .... انا هو انا بكل مافي انا من جنون ........ :D

     

  • At September 24, 2006 2:20 AM, Anonymous Anonymous

    kabarry demaghek.. begad.. i was a skinny child.. then a chubby teenager.. then thin again in uni.. then i got married and gained some weight.. gained more weight at work.. and gained even more weight when pregnant.. then i lost it all after the baby.. probably because beyheddeny and because i had 2 surgeries.. it used to cause a lot of pain when i ate.. men el akher.. khaly balek men se7ettek.. la2en when u lose weight because ur sick.. not a gr8 thing.. though it feels nice when ur old clothes fit again.. but i have multiple scars in my tummy that remind me of how i lost the weight.. khaly balek men se7ettek

     

  • At September 24, 2006 4:52 PM, Blogger Rivendell**

    انسومنياك ... نورتيني بجد انا كنت مبسوطة جدا لما لقيت البلوج بتاعك ... منتهى التلقائية في الفضفضة لدرجة اني قريته كله في ساعتها ,انت عندك حق طبعا وهو دا اللي بقى في دماغي دلوقتي ... صحتي وصحتي بس مش مهم اي حاجه تانيه

     

  • At September 27, 2006 11:47 PM, Anonymous Anonymous

    الظاهر يا كلبوظة إنك كلبوظة سكرة وحقيقية أوى، وشجاعة أوى، وزي ناس كتير من أحجام مختلفة بتقرري وتتكاسلي، بشرية حية يعني، بس أكيد هاتعملي اللي انتى عايزاه أيا كان، تحياتي واحتراماتي، وشابوهاتي، وأختك عندها عكس مشكلتك تماما من زمان أوى نفسي يبان علية أني بنوتة

     

  • At September 30, 2006 5:54 PM, Anonymous Anonymous

    حرام عليكي قلبتس عليا كل المواجع

    انتي كانك بتتكلمي عليا انا بالظبط

     

  • At October 01, 2006 7:59 AM, Blogger Rivendell**

    ااااه من الرفيعين اللي بيشتكوا من رفعهم عندي منك في اصحابي وبابقى عايزة اخنقهم لما بيتكلموا ... ههههه انا بهزر طبعا ... انت اللي سكر وشكرا على الشابو



    شيماء ... كلنا في الوزن - الهم - سواااء

     

  • At October 14, 2006 5:06 AM, Blogger مُزمُز

    This comment has been removed by a blog administrator.

     
Post a Comment 3awda