الله يخرب بيت الكعب العالي على سنين الكعب العالي
طول حياتي وانا من مشجعي الفلات
في الواقع الكوتشيات كمان مش اي فلات
ومبأي في الحياة ريح رجليك وسحقا للمظاهر
اقوم على اخر عمري البس كعب
ولما البس كعب مش البسه بما يتناسب مع كوني مبتدئة في هذا العالم
لااااا ازاي لازم ارزع نفسي كعب 7 سم
كان فين عقلي وانا باجيبه .. كانت فين نوااااضري مش عارفه
ركنته في الدولاب طبعا لاني ماساتحملتش
لكن اتزنقت النهاردة في كعب عالي
كنت لابسه حاجه طويلة وكانت هتجرجر في الأرض لو مشيتها فلات
ادور يمين ... ادور شمال ... اني الاقي اي حاجه تنفع تانيه .. مافيش
يا اخواتي حرااااااام
مااستحملش انا كدا
هفرفر في ايدكم
مالهاش حل تاني
اي نعم انا لبست كوتشي قبل كدا في فرح لكن كان عندي عذر
كان عندي امتحان بعدها ونسيت اشتري حاجه تتلبس
المهم سيبنا من الاستطراد
قولت وبعدين في الحوسه دي ياربي .... اتنيلت لبسته
وعينكم ما تشوف الا النور
انا اساسا مش قصيرة يعني طولي حلو كدا بين البنات
فلما بقى اركب على 7 سم بازرع وبابقى نخلة
والكعب طبعا رفيع مش عريض
والنعل ناااااااااااااعم
يعني راكبة مرجيحة مش بوت
باظبط اموري على الموكيت
لكن عينك ماتشوف الا النور على السيراميك او البلااااط
يا نهاااار ازرق ولا كاني لابسه قباقيب الباتيناج
وروحت الفرح ووقفت مع الناس
ولفيت مع اللي بيلفو وسقفت وهللت
وفي نص الهيصة سيبتهم وروحت قعدت عالسلم
لا تقولي كرسي ولا ترابيزة اقرب حاجه ليا واتركنت عليها وقعدت
وحسيت مشط رجلي عايز يطلع يضربني قلمين ويقولي
الله يحرقك انت والفرح في يوم واحد
وطبعا مش قادرة ابين المعاناة اللي انا فيها
عشان وضعي ومنظري
فضلت مبتسمة ابتسامة بلهااااء وعماله اسقف
تقولش سامعه درس من دروس الشيخ كشك فمتكيفة اوي
وبعد 4 ساعات من العذاب ماقدرتش كلمت اخويا العزيز ييجي يروحني
وانا طالعاله بره .. الكعب اتكسر
ولولا الملامة كان زماني قلعته ومشيت حافية
واللي حاشني انه بوت وبرباط
ووصلت بيتنا ومن ساعتها وانا فاقدة القدرة على المشي
فيا نسااااء العالم
اتحدوااا
للقضاء على مصانع الكعب العالي وعلى محلات الكعب العالي
ولنعد الى الطبيعه
لنعد الى لبس القبقاب
هههههههههههههه
هههههههههههه
والله انا معاكى مليون فى المية
انا من دعاة لبس القباقيب
اينعم احنا معندناش كعب عالى
بس برضو مبحبووش
ههههههههههه
البوست دمه زى العسل
الا يعنى ايه نواضيرى دى
امى كانت بتقولى تنشك فى نواضيرك
وانا مش فاهم يعنى ايه لحد دلوقتى
شتيمة دى
اعملى الجمعية
وانا هعملكم الدعاية بتاعتها
وهصمملكم بانر
لا للكعب العالى