اتعلمت اني لما ابقى منفعله ماكتبش مش عشان هاغلط في حد لكن عشان باتكلم كتير وببعبع كتير وكل اللي جوايا بيطلع وبافقد كل ذرة خصوصية
انا راجعه من الحج بدور على احسن طريقة اتعامل بيها مع انفعالاتي .. انا مش عصبية .. انا حمئية لكن دايما بابقى حاسه بالخط اللي بعديه مش هيبقى في رجعه وعمري ما بعديه
اقول لا اله الا انت سبحانك اني كنت من الظالمين واسمع قرآن .. واسيبها على الله , لكن الاحساس المستمر بالذنب و اتهام الذات بقلة اليقين ما بيخفش
اتعلمت اكسر الحاجز ومااقفش عنده .. واكتشفت ان الخط الاحمر دا بيبقى في دماغي انا بس لاني بخاف من الفقد .. لكن اتضح ان الفقد هو الحل الوحيد لبعض الحالات وان قول الحقيقه الفجة اريح كتير لنفسك من الخوف على مشاعر الناس
قلة الثقة في النفس عادة عامل اساسي في حركة كل البني ادمين يعني كل واحد فينا عنده نقص والنقص دا هو اللي بيحرك كل تصرفاته ولو وصلت لفهم النقص بتاع اللي قدامك وبتاع نفسك يبقى هتفهم كل دوافعك ودوافعه وساعتها هيبقى اختيارك انك تعتبر النقص دا نوع من العذر للتصرفات الغير مبررة وتتعامل مع الموضوع بسماحه
بعد شوية ابتديت احس بملل شديد .. تصرفات الناس بقت مكشوفة بطريقه مستفزة بالنسبالي لدرجة اني ماعدتش باستحمل افضل واقفه لحد ما المخرج يقول استوب
اكتر حاجه تستفزني ان حد يتصور انه فاهمني وعارف شخصيتي كويس لان من الاخر يعني هأو .. كل الناس بتشوف اللي انا عايزاهم يشوفوه وبس .. بقيت خبيرة في التخفي والاختفاء .. بس انا عارفاني كويس .. عارفه كل كلمة في كل سطر من كتابي
مفروض اني اكون ذكية كفاية وامسح كل العك دا بس لاني فعلا فعلا مش مهتمه براي اي حد فيا فمش همسحه
حلول واقعيه للوضع لا يوجد ... فقط التطلع الى رحمة الله بعبيده .. كنت بافكر فيها زي نفق ساعات ابقى شايفه اخره وساعات يضلم ومايبقالهوش اخر وساعات زي دلوقتي ما بيبقاش في نفق ... بتبقى حيطة سد وبس
إيه الكرم ده ؟ وانا أول واحد هعلق كمان؟ .. يا ما انت كريم يا رب.
الأول حج مبرور وذنب مغفور.. وربنا يديمها عليكى نعمة..
ثانيا أنا محتار أقول إيه وانتى قفلتى كل السكك أساسا..سيبيها لله .. وان شاء الله الخير قدام.. ومن قدم شيء التقاه.. وحسنة كتيرة تمنع بلاوى قليلة..
ربنا يوفقك.