مش عارفه ايه مشكلة اني ببان هبلة جدا جدا من برة مع اني جد جدا جوايا يعني لما بابقى لوحدي بابقى جد وكئيبة ولما بابقى بين الناس بتنزل عليا هفة الهزار وببان هبلة مش عارفه ايه المشكلة دي يا ولا, ابويا دايما يقول لا تكن مهزارا فيستخف بك القوم .. بس يا والدي اللي مش بيعرف غير انه يهزر على طول يعمل ايه ا
واحده صاحبتي عامله على ام اللي جابوني كماشة ومفروض برضه اني القطة المغمضة و صراحة انا لسه ماهبتش فيها و اديني مرقدلها وبتفرج ... هيا الفرجه عليها جمارك
لكل قرائي الاعزاء جدا اللي اعرفهم واللي مااعرفهمش ما حدش يتخض مني ويقول عليا بت قلبها اسود انا مش هاقعد اغني في ملائكيتي لكن انا قررت اكتب الكلام اللي فوق دا عشان افتكر مشاعري في اللحظات دي .. لانهم بيبقوا يومين صحيان وبعدها ارجع انسى , صاحبتي بتقولي انت قلبك ابيض هي بس ماتعرفش اني عندي زهايمر مزمن بينسيني
المهم اخر الانباء بقى انا رايحه احج السنة دي بعون الله فدعواتكم ربنا يديني عمر لحد مااخلص اركان الحج كلها وانه يقبله مني
احتمال ومش اكيد اني اتقي الله في نفسي بقى واعمل روجيم بس الاول هاروح اشوف الكوليستيرول بتاعي بقى قد ايه لاني حاسه كدا اني قنبلة موقوته ماشية على رجلين
عندي نوبة انفلونزا لزيزة جدا جدا جدا نفسي اشيل دماغي من مكانها وارميها في بير السلم صراحة
احلى حاجه في الدنيا كلها وقفة في بلكونتنا بعد الفجر بشوية قبل الدنيا ما تشقشق والهوا البارد وريحته النضيفة وصوت صفارة القطر وهو قايم من المحطة عايزة القطها في كادر واعيش جواه للابد
احلى حاجه في الدنيا برضه اني عندي القدرة اني اهبل الكلام دا كله من غير كسفه من نفسي او من الناس
امي واختي والحاج واحشنيييي اوي اوي اوي اوي اوي اوي اوي ... الغربة واعرة جوي
مرمر حبيبة قلبي عيد ميلادها كمان اسبوعين عايزة اعملها مفاجاة بس مش عارفه ازاي
نفسي اسافر اوي الواحد طرشق من جنابه من المللللللل عايزة الف الدنيا دي كلهاااااااااا
انا مطبقة .. اعتقد دا سبب واضح وكافي للتخريف السابق
صباحكم اصفى من اللبن الحليب
:D
Labels: mE
صباح الخيييييييييير
هو انتي كمان مطبقة
عموما واضح جدا من قبل متقولي
موضع الهبل ده ملمس معايا أنا كمان متهيألي كده ان الواحد لما يكون هش وضعيف من جوه وعنده هموم بالبلا بيقوم يعوض كل ده قدام الناس بانه يكون مرح وفكهي ويعيش العبط بجد
مبروووووووووووك جدا على الحج ومتنسيش تدعيلي اسم أمي هو....
اوعي تنسي اتفقنا
سؤال بقى غبي شوية
انتي ازاي متغربة يعني هو انتي بتدرسي في القاهرة مثلا وللا ايه؟
عجبني أوي التعبير ده
" عايزة القطها في كادر واعيش جواه للابداحلى حاجه"
تعبير تحفة بجد
يا ترى خدتي لينك الكتاب وللا لأ؟