شيكا بيكا وبوليتيكا .. ومقالب أنتيكا ولا تزعل ولا تحزن .. اضحك برضه يا ويكا ها ها ها ها .. ع الشيكا بيكا !

Tuesday, May 23, 2006
عنكبوت دا ولا ..
اف اف تحدثكم من اقليم و لحد ما اسخن دماغي وامخمخ في كلام الشتا اللي عامل زي الزبدة يطلع عيه النهار يسيح عليك ويلسوعك هكلمكم عن الصيف - واوعى النملة تهرسك ... وعشان نتكلم عن حال الصيف في الاقاليم يبقى لازم الاول اغسل عنك قاهريتك المترفة و افهمك القوانين الصارمة لكونك من مولودي الاقاليم , من الآخر كدا هنا مافيش سينما ومافيش مسرح - لو هتسمي الطبلية اللي في قصر الثقافة مسرح فدي حريتك الشخصية - , هنا كمان مافيش دار كتب - ولاحقاق الحق هو في بس مقفولة , هنا كذلك مافيش جناين ولا كافتريات - مسألة انها قهاوي دي حرية شخصية برضه - واكيد مافيش مركز ثقافي فرنسي ولا بريطاني ولا حتى بنغالي , مافيش دار اوبرا مافيش ساقية الصاوي مافيش حفلات لمنير ولا لخيرت ولا حتى لسعد الصغير , هنا مافيش دريم بارك ولا السندباد مافيش حتة مولات , هنا مافيش متاحف - في وبرضه هي حرية شخصية - مافيش معارض , هنا مافيش غير بيوت .. بيوت وبس .. لازقة في بعضيها .. وبين كل بيت وبيت في محل موبايلات ومحل هدوم - برضه موضوع الهدوم دا حرية شخصية ولسه حواره جاي - يبقى بمعادلة حسابية بسيطة ... هتعملي ايه في الصيف يا بيضا ... شاطر يا روحي ... هتقعد في البيت ... او ممكن تنام طول النهار وتقضي طول الليل قاعد عالرصيف في الشارع بتهلس انت وشلتك او لو بقى الدنيا مزفلطة معاك حلاوة هتاخدهم وتهجوا على الساحل يا على شرم او اليكس وانت والتساهيل وتوافر البوكت ماني دا طبعا لو سيادتك من ذوي الكروموسوم واي , بس لو انت بقى واد غاوي فقر وانت بت معقدة من بتوع إعمال الفكر والصحصحه الثقافية يبقى سلمولي على صباع لاظوغلي وطمنوني عليكم في جوابات هتبعتوهالي ان شاء الله من فوق دولاب بيتكم بعد ما هتكتشف حقيقة انك عنكبوت وان اهلك كانوا مخبيين عليك من زمان -انزل ياابني ربنا يهديك هاجبلك شريط فيديو لحفلة لعمر خيرت تتفرج عليه ولا تقهر نفسك يا حبيبي - مع العلم اني بكلمكم من فوق النيش الكائن في ريسيبشن بيتنا , وكي تكتمل منظومة الكبت لو انت واد غاوي سياسة يعني من بتوع الحوار الوطني والافاق والقلق دا فمش هتلاقي غير الحزب الوطني -و اللي مقره في ضهر امن الدولة لزم - فاتحلك دراعاته ويبقولك بالاحضان بالاحضان , ولو قلت لأ انا معارضة مش هتلاقي برضه غير مظاهرات الإخوان وسبحي يا أخت والهدوء يا أخ مستنياك , وبما اني خلصت تلقيني للمهارات الضرورية للعمل في الاقاليم هسيبكم دلوقتي , بس راجعه تاني عشان أشد الطابور معاكم ونزور سوا اول معلم من معالم حياة 40 مليون مصري شاء ربنا يبقوا من الاقاليم ...... وماتنساش تكلمني على خط ايوا خط الاقاليم الاول في مصر

Labels:

 
posted by Rivendell** at 2:46 AM | Permalink | 5 الكومنتات الكريمة